مدونة تراث العرب

^{من گلت اريد أمدح علي حسيت زعلت الولي}

^{ومن گتله أنت الأولي گلالي كض السانك}

^{گتله أسولف بلصدگ وأحچي ابخصالك يامحگ}

^{ما أخرج الواقع أبد لازيد شئ ابشانك}

^{گلي مثل موتة فلان ابهوسه سويتوله شان}

^{و هوساتك انگلبن حطب گبره اشتعل نيرانك}

^{وصعدتو شانه للسحب بسمه تمدحون ابچذب}

^{وانت اللي صادق تندعي ليش افگدت وجدانك؟}

^{گتله يحيدر تختلف أنت ابن عم و ولف}

^{وانت نموذج للشعب ضرب المثل ايمانك}

^{و لو أرد أخم كل الزمن ماألگه مثلك مؤتمن}

^{ولو ردت أعدك بلشعر مقصود أعد احسانك}

^{گلي اشبعت منك قهر! چم ليل گضيت ابسهر؟}

^{و تتمثل ابصيتي ولك لو مثلي چان احزانك!}

^{چاراحه ماضلت إلك حتى إشردو منك هلك}

^{ولاعاشرت هاي الخلگ بس تلتهي ابأشجانك}

^{ابخلف المنصه امن أوگفت آيه وروايه سولفت}

^{وإبحي على خير العمل خالي صبح ميدانك}

^{الچذاب للباري عدو وانت اللي بلچذبه كفو}

^{يامستغابيت وگمت تاكل لحم خوانك}

^{تلطم على احسين ابعزاء و تنسى دراسة كربلاء}

^{و ياليتنا وياليتنا إمعلگهه طرف السانك}

^{تدري إشكثر صابه سهم واشلون يافوخه انجسم}

^{وتدري ابوقايع كربلا وتنعي و تجر بألحانك}

^{وماتدري بي ليش انذبح واعليمن ابدمه سبح}

^{ولاتدري چم ركعه الذي صلى ابشهر رمضانك}

^{العباس گلك چم طلي اتخليهن امفطح إلي}

^{حتى يحمدونك چذب وايشيع اسم ديوانك}

^{وماتدري بلفقرا إبأساء تتغده ماعدهه عشاء}

^{العنوان يمك موبعيد امجاور ابحيطانك}

^{ولو ماتنفقه اللي محب البر أبد ماينكسب}

^{ولوتچوي گصتك لاتظن روضه وجنان إمكانك}

^{وإعله الظلم لوسلهمت عين الحقيقه و سلمت}

^{شيطان ذاتا بلنفس مشبوگ أشوف السانك}

^{شيطان لله اشگد عبد بس للبشر مارد سجد}

^{وذاك اللي ميصلي بعد بيض وجه شيطانك}

^{ماريد فضه لو ذهب خلو ضريحي من خشب}

^{لو شوفن ابلايه عشا نامو ولد جيرانك}

^{وماريد شيعه بس اسم لاريد اسلام الرسم}

^{لوكون مسلم واقعي لو رد لأبوسفيانك}

^{الشاعر حاج عارف الخمیسی}